Tuesday, August 28, 2012

දළ දේශීය නිෂ්පාදනයෙන් 6% තිබ්බොත් අධ්‍යාපණේ ගොඩ ගන්න පුලුවන් ද?

සීයට 6න් නම් බෑ... ලංකාවේ තියෙන ප්‍රධාන පාසල් එකක් වත් ආණ්ඩුවේ සල්ලි වලින් නඩත්තු වෙන්නෙ නෑ... ඒ ඉස්කෝල වල ආදි ශිෂ්‍ය ශිෂ්‍යාවන් ගේ සහ දරුවන් ගේ දෙමාපියන් දෙන පරිත්‍යග වලින් තමය් ඒ ඉස්කෝල ඉදිරියට ඇවිත් තියෙන්නේ.

නිදහස් අධ්‍යාපනේ ඇත්තටම ඕනේ අයට විතරක් දීලා, මුදල් අය කරන්න පුලුවන් අයගෙන් මුදල් අය කරන ක්‍රමයක් ඕනේ අධ්‍යාපනේ ඇත්තටම ගොඩ ගන්න නම්.

ටික දෙනෙකුට දෙන නිදහස් අධ්‍යාපණේට වඩා, හැමෝටම අධ්‍යාපණේ ලබන්න අයිතිය දෙන එක වැදගත්.

හැමෝටම නොමිලේ උගන්නන්න පුලුවන් නම් ඒක තමයි හොඳම. ඒත්, අපේ රටේ ආර්ථිකේ එක්ක, තියෙන ගසා කෑම් එක්ක ඒක කරන්න බෑ කියන එක පිලිගන්න ඕනේ.

අධ්‍යාපණේ වෙනුවෙන් වියදම් කරන්න පුලුවන්, වියදම් කරන මධ්‍යම පංතියක් අපේ රටේ ඉන්නවා. මම කතා කරන්නේ රට යවලා ලමයින්ට උගන්වන ධනපතියෝ ගැන නෙවෙයි. ශාන්ත තෝමස්, රෝයල්, ආනන්ද, මියුසියස් වගේ ඉස්කෝල ගැන. ඒවගෙන් සමහර ඉස්කෝල පෞද්ගලික ඉස්කෝල, ආණ්ඩුවේ විෂය නිර්දේෂ උගන්වන. සමහර ඒවා ආණ්ඩුවේ ඉස්කෝල. ඒත් ඒවා ගමේ ගොඩේ ඉස්කෝල වගේ නෙවෙයි. ඒවට යන්න මිනිස්සු කැමැත්තෙන් විශාල ආධාර දෙනවා පාසල් අරමුදලට.

හැබැයි ඒ සල්ලි ගුරුවරුන්ට ලැබෙන්නේ නෑ. අයතා ක්‍රමේකට ගත්තේ නැත්තම්. වෙනත් පාසල් වලට ලැබෙන්නෙත් නෑ. ඉතින් ඔය ක්‍රමේ වෙනුවට, ඒ ඒ පාසලේ තියෙන පහසුකම් අනූව හරි, දිස්ත්‍රික්කේ අනූව හරි කොහොම හරි, එක් ආර්ථික මට්ටමකට වඩා උඩින් ඉන්න පවුල් වල දරුවන් ගෙන් මුදලක් අය කරලා ඉගැන්නුවොත්, ඒ මුදල දුෂ්කර පාසල් දියුණු කරන්නත්, ගුරුවරුන්ගේ පඩි වැඩි කරන්නත් යොදවන්න පුලුවන් නේද?

විශ්ව විද්‍යාල පද්ධතියටත් මේ ක්‍රමේට සමාන දෙයක් කරන්න පුලුවන්. විශ්ව විද්‍යාල සිසුන්ට අර්ධ කාලීන රැකියා කරන්නත්, අධ්‍යාපණ වියදම් සඳහා අඩු පොලී ණය ලබා ගන්නත් ආණ්ඩුව පහසුකම් සපයා දෙන්න ඕනේ... ඒ ණය රැකියා කරන කාලේක ගෙවන්න. එහෙම කරලා, විශ්ව විද්‍යාල අධ්‍යාපණේට සාධාරණ මුදලක් අය කරාට කමක් නෑ. දැනටත් ආණ්ඩුවේ විශ්ව විද්‍යාල හැම එකකම පශ්චාත් උපාධි සඳහා අයකිරීම් කරනවා - ඒක සාධාරණ අය කිරීමක්.

එහෙම කරොත්, විශ්ව විද්‍යාල ප්‍රවේශයට සුදුසු කම් ලබන හැමෝටම ඒ සඳහා අවකාශ සලසන්න පුලුවන් වේවි. දැනට ඒ සඳහා අවකාශ ලැබෙන්නේ 16% විතර පමණයි.

මේ 6% ඉල්ලීම, දැනට තියෙන මඩ ගොහොරුව තවත් මඩ කිරීමක් මිසක් අධ්‍යාපණ ප්‍රශ්නෙට විසඳුමක් විදිහට මම දකින්නේ නෑ.

මේ 1800 ගනන් වල රුසියාව නොවෙයි, සමාජයේ දුප්පතුන් සහ පොහොසතුන් පමණක් සිටිය.. මේ සමාජයේ සැලකිය යුතු ප්‍රමාණයක් මධ්‍යම පාණ්තිකයින්, භාණ්ඩ හා සේවා සඳහා සාධාරණ මිලක් ගෙවිය හැකි සහ එසේ ගෙවීමට කැමති...

4 comments:

  1. [මේ 6% ඉල්ලීම, දැනට තියෙන මඩ ගොහොරුව තවත් මඩ කිරීමක් මිසක් අධ්‍යාපණ ප්‍රශ්නෙට විසඳුමක් විදිහට මම දකින්නේ නෑ.]

    මේ කරුණට හැරෙන්න අනෙක් කාරණා වලට එකඟයි.
    6% ඉල්ලීම මඟින් මේ තියෙන අර්බුධය විසඳෙයි කියල මමත් විශ්වාස කරන්නෙ නැහැ. නමුත්, 6% ඉල්ලීම දැනට තිබෙන තත්වය තවත් මඩ කිරීමක්ය කියන එකට එකඟ නැහැ.
    නොඑක් අඩුපාඩු ඇතැත්, මේ ඉල්ලීම හරහා ඇතිකරන බලපෑම සමාජයට යහපත් ලෙස බලපානු ඇතැයි සිතනවා.

    “නිදහස් අධයාපනය“ කියන දේ දැනට පොදු බහුතර සමාජය තේරුම් ගෙන ඇති ‘නොමිලයේ අධයාපනය‘ කියන තැනින් වෙනස්ව වඩා පුලුල්ව ක්‍රියාත්මක විය යුතු දෙයක්. එහිදී, සියයට, සියයක් හැම කෙනෙකුටම නොමිලයේ අධ්‍යාපනය ලබාදෙන්න පවතින තත්වය යටතේ රටටකට නොහැකි උනත්, හැම කෙනෙකුටම විෂමතාවයකින් තොරව අධයාපනය ලබා ගන්න අවශ්‍යය වටපිටාව සකස් කරන්න හැම රජයකට වගකීමක් තිබෙනවා. ඒ සඳහා අධයාපනයට මුදල් වැය කිරීමට හැකියාවක් ඇති අයගෙන් යම් අයකිරීමක් කිරීම හෝ එක් එක් පුද්ගලයාට අධයාපනය සහා රජය විසින් වැය කරන මුදලින් යම් ප්‍රතිශතයක් ඔහු අධ්‍යාපනය හමාර කොට රැකියාවක නියුක්ත වන කාලය අතරතුර අය කරගැනීම හෝ ශිෂ්‍යත්ව, බැංකු ණය යනාදී විකල්ප ක්‍රම වලට යා හැකියි.

    වැදගත්ම දේ සැමට අධ්‍යාපනය ලැබීමේ අයිතිය සුරක්ෂිත කිරීම සහ අධයාපනය ප්‍රමුඛතාවයෙන් ඉහලම ක්ෂේත්‍රය විදියට පවත්වාගෙන යාම.

    ReplyDelete
  2. සියයට හයක් ඉල්ලන එක තවත් මඩ කිරීමක් කියලා මම කියන්න හේතුව, ඒ 6% ලැබුණොත් සියලු ප්‍රෂ්ණ විසඳෙනවා වගේ මේ උද්ගෝශකයින් කතා කිරීම.

    අධ්‍යාපනයට ආණ්ඩුවෙන් සල්ලි දීලා විතරක් මදි, ආණ්ඩුවත්, මේ උද්ගොෂන කරන අචාර්ය වරුනුත් එකතු වෙලා, ඒ මුදල් වලින් මේ අධ්‍යාපන පද්ධතිය වෙනස් කරන්න ඕනේ කියලා කියනවා මට මේ උද්ගෝශකයින් ගෙන් ඇහෙන්නේ නෑ.

    මේක මේ වෙලේම කර ගන්න ඕනේ දෙයක්. මේ උද්ගෝෂනේ හොඳින් හරි නරකින් හරි ඉවර උනාට පස්සේ, ආයෙ පාරක් මේ විදිහට සංවිධානය වෙලා අධ්‍යපන ප්‍රතිසංස්කරනයක් ඉල්ලන්න වෙන්නේ නෑ කාලෙකට.

    ReplyDelete
  3. මේ සටහනේ තියන සරල වැදගත් සත්‍ය්‍ය ඔය ප්‍රතිපත්ති ගෙනෙන/හදන අයට වැටහෙන්නෙ නැතිකම නෙමෙයි!!!

    හැමට නොමිලේ උගන්වන්න පුළුවන් ක්‍රමයක් ලෝකේ කවුරුත් හොයාගෙන නැතිකොට ලංකාව එහෙම කරන්නෙ කොහොම ද?!!

    //වැදගත්ම දේ සැමට අධ්‍යාපනය ලැබීමේ අයිතිය සුරක්ෂිත කිරීම සහ අධයාපනය ප්‍රමුඛතාවයෙන් ඉහලම ක්ෂේත්‍රය විදියට පවත්වාගෙන යාම.// ජයවේවා!!!!

    ප්‍රතිපත්ති හදන තැනක ඉන්න කිසි කෙනෙක් මෙයට සවන් නොදුන්නාට ඔබේ උත්සාහයට ජය!

    ReplyDelete
  4. ප්‍රතිපත්ති හදන තැනක තියා, විශ්ව විද්‍යාල ආචාර්ය මණ්ඩල වල වත් නැති එක නේ දුක අරුණි...

    ReplyDelete